ევროპის გუნდი (Team Europe): ევროპის საინვესტიციო ბანკი ახორციელებს 100 მილიონი ევროს მოცულობის ინვესტიციას საქართველოში ჯანდაცვის ინფრასტრუქტურის მხარდასაჭერად

22/12/2020
  • ევროკავშირის გარანტიით უზრუნველყოფილი, ევროპის საინვესტიციო ბანკის 100 მილიონი ევროს მოცულობის სესხი საქართველოს მისცემს შესაძლებლობას, განახორციელოს შვიდი მთავარი საავადმყოფოს, მათ შორის COVID-19-ით ინფიცირებული პაციენტების მიმღებ საავადმყოფოებად გადაკეთებული საავადმყოფოების, მოდერნიზება.
  • სესხი ასევე ითვალისწინებს COVID-19-თან დაკავშირებული აუცილებელი სამედიცინო აღჭურვილობის შესყიდვას.
  • აღნიშნული ინვესტიცია წარმოადგენს ევროპის საინვესტიციო ბანკის მიერ COVID-19-ზე რეაგირებისა და პანდემიის პერიოდში „ევროპის გუნდის“ მიერ ევროკავშირის პარტნიორი ქვეყნებისათვის 6.7 მილიარდი ევროს მოცულობის უზრუნველყოფილი დახმარების პაკეტის ნაწილს.

ევროპის საინვესტიციო ბანკი (EIB), რომელიც ევროკავშირის ბანკს წარმოადგენს, განახორციელებს 100 მილიონი ევროს მოცულობის ინვესტიციას COVID-19-ის პანდემიის დროს საქართველოს ძირითადი სამედიცინო ინფრასტრუქტურის მოდერნიზებისა და გაუმჯობესების, ახალი სამედიცინო პერსონალის სწავლებისა და საქართველოს ჯანდაცვის სისტემისთვის აუცილებელი  სამედიცინო აღჭურვილობის შესყიდვების დაფინანსების უზრუნველსაყოფად.

ევროკავშირის გარანტიით უზრუნველყოფილი, ევროპის საინვესტიციო ბანკის სესხი საქართველოს მთავრობას მისცემს შესაძლებლობას განახორციელოს საქართველოს შვიდი მთავარი საავადმყოფოს:  ცენტრალური რესპუბლიკური საავადმყოფოს, ბავშვთა ინფექციური საავადმყოფოს, ლისის საავადმყოფოს, რუხის საავადმყოფოს, ბათუმის რესპუბლიკური საავადმყოფოს, თბილისის საუნივერსიტეტო კლინიკისა და ინფექციური პათოლოგიის შიდსისა და კლინიკური იმუნოლოგიის სამეცნიერო-პრაქტიკული ცენტრის მოდერნიზება. ამ საავადმყოფოების რიცხვში შედის ის საავადმყოფოებიც, რომლებიც COVID-19-ით ინფიცირებული პაციენტების მიმღებ საავადმყოფოებად გადაკეთდა და მნიშვნელოვან როლს ასრულებენ ქვეყანაში ვირუსის გავრცელების შეჩერებაში.

ევროპის საინვესტიციო ბანკის მიერ გამოყოფილი დაფინანსებით ასევე მოხდება თანამედროვე სამედიცინო აღჭურვილობისა და ვაქცინების შეძენა, აგრეთვე COVID-19-ით ინფიცირებული პაციენტებისთვის სრულყოფილი დიაგნოსტიკური და სამკურნალო მომსახურების მიწოდების ეფექტიანი ჯაჭვის შექმნა. 

ევროპის საინვესტიციო ბანკის ვიცე-პრეზიდენტმა, ტერეზა ჩერვინსკამ, რომელიც  საქართველოში ბანკის საქმიანობაზე პასუხისმგებელია, აღნიშნა: „ჩვენი ინვესტიციის მიზანია, დავეხმაროთ საქართველოს ქვეყნის წამყვანი საავადმყოფოებისა და სამკურნალო ცენტრების მოდერნიზებაში, აგრეთვე სამედიცინო აღჭურვილობის შეძენასა და ახალი სამედიცინო პერსონალის სწავლებაში. აღნიშნული დახმარებით საქართველო შეძლებს ჯანმრთელობის დაცვის სისტემის გაუმჯობესებას, საკუთარი მოქალაქეებისა და სამედიცინო პერსონალის დაცვასა და შეიძენს თანამედროვე საშუალებებს პანდემიასთან გასამკლავებლად. მადლობას ვუხდი საქართველოს მთავრობას, რომელმაც მოგვცა შესაძლებლობა დავხმარებოდით საქართველოს მოქალაქეებს ამ რთულ პერიოდში და შეგვეტანა საკუთარი წვლილი თანამედროვე და წარმატებული ქვეყნის მშენებლობაში“.

ევროკავშირის ელჩმა საქართველოში, კარლ ჰარცელმა განაცხადა: „ევროკავშირი აგრძელებს საქართველოს მხარდაჭერას პანდემიის პერიოდში. დღეს მე სიამაყით მინდა გამოვაცხადო საქართველოსთვის უზრუნველყოფილი მხარდაჭერის კიდევ ერთი ეტაპის შესახებ – ეს არის ევროკავშირის ბანკის

 ევროპის საინვესტიციო ბანკის მიერ საქართველოსთვის გამოყოფილი 100 მილიონი ევროს (400 მილიონი ლარის) მოცულობის შეღავათიანი სესხი.

სესხი განკუთვნილია ჯანდაცვის სისტემის საჭიროებების დასაკმაყოფილებლად –  მნიშვნელოვანი საქმიანობის შესრულებაში იმ ქალებისა და მამაკაცების დასახმარებლად, რომლებიც ჩვენს მხარდაჭერასა და პატივისცემას იმსახურებენ. აღნიშნული თანხა ემატება იმ 1.5 მილიარდი ლარის მოცულობის დახმარებას, რომლის მობილიზებაც ევროკავშირმა და „ევროპის გუნდმა“ საქართველოს დასახმარებლად წელს უკვე უზრუნველყო. ევროკავშირი აგრძელებს მუშაობას საერთაშორისო პარტნიორებთან, საქართველოს მთავრობასთან, სამოქალაქო საზოგადოებასთან და ადგილობრივ ბანკებთან იმისათვის, რომ დაეხმაროს საქართველოს მოქალაქეებს, სადაც ეს აუცილებელი და შესაძლებელია.“

საქართველოს ფინანსთა მინისტრმა, ივანე მაჭავარიანმა აღნიშნა: “საქართველოს მთავრობა მადლობას უხდის ევროპის საინვესტიციო ბანკს (EIB)  ჯანდაცვისა და ეკონომიკის სექტორებში COVID-19-ის პანდემიით გამოწვეულ შედეგებთან ბრძოლაში მხარდაჭერისთვის. 

  პანდემიის მეორე ტალღამ აუცილებელი გახადა შემდგომი გადაუდებელი ზომების მიღება. ჩვენ ვაფასებთ პარტნიორების სწრაფ რეაგირებას. ძალიან მნიშვნელოვანია, რომ ევროპის საინვესტიციო ბანკი საქართველოს გამოუყოფს 100 მილიონ ევროს COVID-19-ის წინააღმდეგ მიმართული ღონისძიებების მხარდასაჭერად.

ეს თანხა გამოიყენება პანდემიის დასკვნით ეტაპზე და ხელს შეუწყობს საქართველოს მიერ დაავადების მართვასთან, ლაბორატორიების შესაძლებლობების გაძლიერებასთან და ვაქცინის მარაგის შექმნასთან დაკავშირებული გადაუდებელი საჭიროებების დაფინანსებას.

საქართველოს მთავრობა კიდევ ერთხელ, ხაზგასმით აღნიშნავს EIB-ს მიერ გაწეული ფინანსური მხარდაჭერის უზარმაზარ ღირებულებას და მზადაა გააგრძელოს წარმატებული თანამშრომლობა.”

აღნიშნული ინვესტიცია საქართველოს მთავრობას მისცემს შესაძლებლობას, გააუმჯობესოს საქართველოს ჯანმრთელობის დაცვის სისტემის ხარისხი და მედეგობა, გააძლიეროს COVID-19-ის პანდემიაზე ეფექტიანი რეაგირების პოტენციალი და გადაარჩინოს ადამიანების სიცოცხლე საქართველოს 3.7 მილიონი მოქალაქისთვის უკეთესი სამედიცინო მომსახურების უზრუნველყოფის გზით. ევროპის საინვესტიციო ბანკის მიერ საქართველოს მდგრადი სოციალური და ეკონომიკური განვითარებისთვის დღემდე უზრუნველყოფილი ინვესტიციების მოცულობა დაახლოებით 2 მილიარდ ევროს შეადგენს.

დამატებითი ინფორმაცია

ევროპის საინვესტიციო ბანკის შესახებ:

ევროპის საინვესტიციო ბანკი არის ევროკავშირის წევრი ქვეყნების მფლობელობაში არსებული გრძელვადიანი დაკრედიტების ინსტიტუტი, რომელიც ევროკავშირის პოლიტიკის მიზნების მისაღწევად  გონივრული ინვესტიციებისთვის გრძელვადიან დაფინანსებას უზრუნველყოფს.

ევროპის საინვესტიციო ბანკისა და COVID-19-ის საწინააღმდეგო ვაქცინებში, მკურნალობასა და დიაგნოსტიკაში მის მიერ განხორციელებული ინვესტიციების შესახებ:

ევროპის საინვესტიციო ბანკის მიერ COVID-19-ის საწინააღმდეგო ვაქცინებზე, მკურნალობასა და დიაგნოსტიკაზე მომუშავე 20 ევროპული სამედიცინო და ბიოლოგიური ტექნოლოგიების კომპანიებისთვის დღემდე უზრუნველყოფილი დაფინანსების მოცულობა 700 მილიონ ევროს შეადგენს, აქედან 100 მილიონი ევროს მოცულობის ინვესტიცია განხორციელდა Pfizer/BioNTech ვაქცინის შემქმნელ გერმანულ კომპანია  BioNTech-ში. ჯანმრთელობასთან დაკავშირებით შექმნილი კრიზისის ფონზე, აღნიშნული დაფინანსება ასახავს ევროპის საინვესტიციო ბანკის ძალისხმევას COVID-19-ის ახალი და ეფექტიანი სამკურნალო საშუალებების შექმნის მხარდაჭერის მიმართულებით. დამატებითი ინფორმაციისათვის მიმართეთ ევროპის საინვესტიციო ბანკის პრეს სამსახურს.

ევროპის საინვესტიციო ბანკი საქართველოში:

2007 წლიდან, მას შემდეგ, რაც ევროპის საინვესტიციო ბანკმა საქართველოში საქმიანობა დაიწყო, ბანკმა დაახლოებით 2 მილიარდი ევროს მოცულობით დააფინანსა  23 პროექტი ისეთ სფეროებში, როგორიცაა ინფრასტრუქტურის განვითარება, კერძო სექტორის მხარდაჭერა და კლიმატის ცვლილების შერბილებაზე მიმართული ღონისძიებების მხარდაჭერა. 2014 წელს საქართველო-ევროკავშირის ასოცირების შესახებ შეთანხმებისა და ევროკავშირსა და საქართველოს შორის ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) ხელმოწერით ევროპის საინვესტიციო ბანკმა საქართველოს მხარდაჭერა კიდევ უფრო გააძლიერა, რის შედეგადაც საქართველო, ერთ სულ მოსახლეზე გაანგარიშებით, ევროკავშირის აღმოსავლეთ სამეზობლოში ევროპის საინვესტიციო ბანკის ყველაზე მსხვილი ბენეფიციარი გახდა.

ევროპის საინვესტიციო ბანკი საქართველოში პროექტების უმეტესობას ევროკავშირის გარე დაკრედიტების მანდატის საფუძველზე აფინანსებს. ეს მანდატი ევროპის საინვესტიციო ბანკს ანიჭებს გარანტიას, რომელიც უზრუნველყოფილია ევროკავშირის ბიუჯეტით პროექტებისთვის სოციალური და ეკონომიკის ინფრასტრუქტურის, ადგილობრივი კერძო სექტორის განვითარებისა და კლიმატის ცვლილების შერბილების და ადაპტაციის სფეროებში. საქართველოში ევროპის საინვესტიციო ბანკის საქმიანობის შესახებ დამატებითი ინფორმაციის მისაღებად, გადადით ბმულზე

საკონტაქტო ინფორმაცია:

ევროპის საინვესტიციო ბანკის ჯგუფი: ტიბორ იონა, ელ.ფოსტა: t.jona@eib.org, ტელ.: +352 691 287 052

ვებ-გვერდი: www.eib.org/press პრეს სამსახური: +352 4379 21000 – press@eib.org

The information on this site is subject to a Disclaimer and Protection of personal data. © European Union 2021